Þjónustu- og þekkingarmiðstöð fyrir blinda, sjónskerta og einstaklinga með samþætta sjón- og heyrnarskerðingu

Beint á efnisyfirlit síðunnar
27. maí 2015

Þjónustu- og þekkingarmiðstöð tekur í samvinnu við Háskóla Íslands þátt í stóru verkefni fimm Evrópulanda sem miðar að því að búa til skynjunarbúnað fyrir blinda einstaklinga.

„Verkefnið gengur út á að hanna búnað fyrir blinda einstaklinga til að þeir geti skynjað hluti úr umhverfinu. Í stað þess að fá upplýsingar með sjóninni gefur tækið okkur upplýsingar um umhverfi, annars vegar með hljóði og hins vegar snertingu, m.a. titringi. Hugmyndin er að búnaðurinn gefi umhverfisskynjun svo auðveldara verði fyrir blinda að komast leiðar sinna,“ segir Eyþór Kamban Þrastarson, verkefnisstjóri Sound of Vision hjá Þjónustu- og þekkingarmiðstöð.   

Um 600 milljóna króna styrkur hefur fengist frá ESB til verkefnisins og samstarfsaðilar erlendis eru hátæknifyrirtæki og háskólar í Póllandi, Ungverjalandi, Rúmeníu og Slóveníu. Hér á landi eru það sálfræðideild, iðnaðar- og vélaverkfræðideildir og tölvunarfræðideild sem koma að verkefninu fyrir hönd HÍ sem er í samstarfi við Þjónustu- og þekkingarmiðstöð.

Kortleggur þörfina hjá notendum 

Eyþór starfar fyrir hönd Þjónustu- og þekkingarmiðstöðvar að verkefninu og um þessar mundir sér hann um að leggja spurningalista fyrir notendur. „Með þessu erum við að kortleggja þörfina fyrir slíkan búnað og gefa mynd af því hvað á að leggja áherslu á í sambandi við búnaðinn,“ segir Eyþór og bætir við að síðar verði prófanir fyrir fólk sem mun geta nýtt sér búnaðinn og hann muni starfa við þær. Hann segir mikilvægt að hlustað sé á notendur til að búnaðurinn virki sem best fyrir þá sem munu nota hann í framtíðinni.

Hann segir mikinn slagkraft í verkefninu nú og að vel hafi gengið. „Ég er að hringja út í notendur og leggja fyrir þá spurningalista. Fólk tekur þessu vel og hingað til hefur enginn neitað mér um svör,“ segir Eyþór að lokum og brosir.

Umfjöllun Fréttablaðsins um verkefnið á pdf formi. 

Heimasíða Sound of Vision verkefnisins.

Til baka