Þjónustu- og þekkingarmiðstöð fyrir blinda, sjónskerta og einstaklinga með samþætta sjón- og heyrnarskerðingu

Beint á efnisyfirlit síðunnar
17. desember 2015

Fimm fengu styrk úr Þórsteinssjóði

Fimm blindir og sjónskertir stúdentar við Háskóla Íslands fengu á dögunum styrk úr Þórsteinssjóði. Þetta er í sjöunda skipti sem úthlutað er úr sjóðnum og nemur upphæð styrkjanna samtals tólf hundruð þúsund krónum, að því er fram kemur á heimasíðu Blindrafélagsins.

Megintilgangur Þórsteinssjóðs er að styrkja blinda og sjónskerta stúdenta til náms við Háskóla Íslands. Enn fremur er sjóðnum ætlað að efla rannsóknir sem aukið geta þekkingu á blindu og skertri sýn og afleiðingum hennar og fjölga þannig tækifærum blindra og sjónskertra til að auðga og efla líf sitt. Sérstök áhersla er lögð á styrki til rannsókna í félags- og hugvísindum sem falla að tilgangi sjóðsins.

Í ár hlutu fimm nemendur námsstyrki: Ásdís Lilja Guðmundsdóttir, nemi í næringarfræði, Hekla Dögg Ásmundsdóttir, nemi í félagsráðgjöf, Helga Theódóra Jónasdóttir, nemi í sálfræði, Rósa María Hjörvar, nemi í þýðingafræði, og Snædís Rán Hjartardóttir, nemi í stjórnmálafræði. Jón Atli Benediktsson, rektor Háskóla Íslands, afhenti styrkina við hátíðlega athöfn í Norræna húsinu.

Sjóðurinn var stofnaður af Blindravinafélagi Íslands 6. desember 2006. Hlutverk og tilgangur Þórsteinssjóðs helgast af æviverki Þórsteins Bjarnasonar, sem fæddist 3. desember árið 1900. Hann stofnaði Blindravinafélag Íslands 24. janúar 1932 og var það fyrsti vísir að félagi til hjálpar fötluðu fólki hér á landi. Þórsteinn helgaði líf sitt blindum og sjónskertum einstaklingum á Íslandi á síðustu öld án þess að þiggja nokkru sinni laun fyrir heldur lagði félaginu þvert á móti til fé úr eigin vasa.

 

Til baka