Að hitta leiðsöguhunda – leiðbeiningar

Á Íslandi eru nú starfandi um 13 leiðsöguhundar, flestir þeirra á höfuðborgarsvæðinu. Hundarnir eru ræktaðir og þjálfaðir erlendis, og svo tekur við samþjálfun hunds og notanda þegar hingað er komið. Samvinna notanda (blindu eða sjónskertu manneskjunnar) og hunds krefst mikillar einbeitingar; hundurinn þarf að lesa í umhverfið, notandinn að lesa í viðbrögð hundsins og hundurinn þarf svo aftur að lesa í hvernig notandinn hagar sér. Því er mikilvægt að hundurinn sé ekki truflaður þegar hann er „í vinnunni“.

Vinnudagur hundanna er misjafn og þeir fá alltaf hvíld eða vinnuhlé reglulega yfir daginn.
En: Hundur í áberandi vesti (appelsíngulu og/eða skærgulu) og/eða með merkt beisli er nær undantekningalaust í vinnunni.

Ef þú hittir fyrir vinnandi hund, hafðu þá í huga:

• Ekki ræna athygli hundsins: Þegar leiðsöguhundur er í vinnunni má ekki beina athygli hans frá notandanum eða umhverfinu. Það þýðir að ekki má klappa hundinum, ekki gefa honum að borða, og helst ekki horfa í augun á honum.
• Að taka framúr leiðsöguhundi: Farðu framhjá notandanum, ekki hundinum. Sé hundurinn vinstra megin við notandann, taktu þá framúr hægra megin við parið. Þetta á við hvort sem þú ert gangandi, hjólandi eða á hlaupahjóli. Hægðu á þér áður en þú tekur framúr (og það á við um alla sem fara áberandi hægar en þú, ekki bara leiðsöguhunda).
• Ef þú ert sjálf/ur/t með hund: Gættu þess að þinn hundur sé í ól og að þú hafir stjórn á honum. Hundar í bandi verða sérstaklega óöruggir ef þeir mæta lausum hundum, og það á við um alla hunda. Það getur líka verið hjálplegt að láta viðkomandi vita að þú sért með hund.
• Ef þig grunar að viðkomandi þurfi aðstoð, bjóddu hana þá fyrst áður en þú gerir eitthvað. Ekki grípa í manneskju með leiðsöguhund og alls ekki grípa í beislið.
• Ef þú gengur samsíða manneskju með leiðsöguhund, gakktu þá þeim megin sem hundurinn er ekki, því hundurinn þarf að geta skynjað vel umhverfið í kringum sjálfan sig og notandann.
• Aðstoð með leiðsöguhund: Notendur leiðsöguhunda eru þjálfaðir í að vinna með sinn hund og atferli hans. Ekki grípa inn í nema notandi óski eftir því.
• Samkvæmt lögum mega leiðsöguhundar fara inn á alla þá sömu staði og notendur þeirra.

Hér má lesa ýmislegt meira um leiðsöguhunda.